Psa 92 | TVK | STEP | Bos mak mu tengan ti masa memesien vaha minuk, Iahova; mapet rat hisom del kikeien xil, xouk xa ode ut nesao.

Psalms 92

Sisien te Melengien Eo na Hi

1 Bos mak mu tengan ti masa memesien vaha minuk, Iahova;
mapet rat hisom del kikeien xil, xouk xa ode ut nesao.
2 E makoe xil vus, ti muhit usil eheien nam;
e vongien xil ngasen, muhiteni mun xa xouk opol sein naha xa otehit xati.
3 Makikei minuk del vangivue xil
e mabas kitar mun ve xouk.
4 Mabesi xamem pupu ve sexien xil nam;
ve polien xa xouk di opol ni di makikei del memaalen.

5 Iahova, polien nam xil tellep pupu;
nenemien nam be nesao.
6 Moletin xa be unu misakras vakila;
e tei xa vatin tovuol takil ti vari holesok xil ak:
7 Tave ti neta xa moletin tesa xil lastal langgoni munae tesa xil,
e ngan xil xa lapol misa ladit bos tang;
vengan xa Hi imu vuol ni xil.
8 E xouk, Iahova, vehakut, ti mupet rat hisom.

9 Iahova, makila xa xil xa di labae minuk lilel;
e moletin tesa xil, uhol lelen xil ngasen.
10 Iahova, veok nggeih vengan xa osa xeihen minou,
e oduxol xat nou del memaalen.
11 Nalong isien na ngan xil xa labae del nou,
e napus kila xa xeihen nae tovuol ngamu.

12 Moletin xil xa meulien nae momal limeul ixoni viavi;
e liti ihe nousav ixoni vatit vei.
13 Moletin xil ak langgoni vatiei xil xa lalih xil ladi visal nim na Iahova;
xa lameul e vioh na Hi nar.
14 Neta sav xa labe vatiei matu, di laba,
e vehakut lameul bos e vexil nggeih.
15 Ngan ak di pisen ni xa sexien na Iahova momal tevi;
xi xa di ngguxou venou, neta tovuol vakavui en.